Klub Ole Qunnar Solskyaerin geri dönüşünü istisna etdikdən sonra Maykl Kerrik rəsmi şəkildə “Mançester Yunayted”in müvəqqəti baş məşqçisi təyin olunub. Solskyaerin 2021-ci ilin noyabrında vəzifədən uzaqlaşdırılmasından sonra onun köməkçisi kimi çalışan və üç oyunda komandaya müvəqqəti rəhbərlik edən Kerrik, Ruben Amorimin ötən həftə işdən çıxarılmasından sonra mövsümün sonunadək komandanı çalışdıracaq.
Klubun yaydığı bəyanatda bildirilir: “Mançester Yunayted” 2025/26 mövsümünün sonuna qədər əsas komandanın meneceri vəzifəsinə Maykl Kerrikin təyin edildiyini məmnuniyyətlə elan edir. Kerrik klubun heyətində 464 matça çıxıb, beş Premyer Liqa çempionluğu, bir FA Kuboku, iki Liqa Kuboku, UEFA Çempionlar Liqası, UEFA Avropa Liqası və FIFA Klublararası Dünya Kubokunu qazanıb. O, 2018-ci ildə futbolçu karyerasını başa vurduqdan sonra məşqçilər korpusuna qoşulub, Joze Mourinyo və Ole Qunnar Solskyaerin rəhbərliyi altında çalışıb. Solskyaerin gedişindən sonra Kerrik müvəqqəti baş məşqçi kimi kluba layiqincə rəhbərlik edib. Keçmiş İngiltərə millisinin üzvü 2022-ci ilin oktyabrından etibarən iki il yarım “Midlsbro”nun baş məşqçisi olub.
“Yunayted”ə yaxın mənbələr bildirirlər ki, mövsümün ortasında daha bir menecer dəyişikliyi arzuolunan olmasa da, Amorimin nəticələri və oyun keyfiyyəti Çempionlar Liqasına vəsiqə uğrunda şansları qorumaq üçün operativ qərar verməyi zəruri edib.
Portuqaliyalıların oyunundan üç gün əvvəl Futbol Direktoru Ceyson Uilkoksla Amorim arasında yaşanan gərgin müzakirədən sonra, rəsmi ayrılıq baş tutub və klub mövsümün sonunadək daimi baş məşqçi seçimi üçün genişmiqyaslı axtarışa vaxt qazanmaq məqsədilə müvəqqəti təyinat prosesinə start verib. Riskləri azaltmaq üçün klubu yaxından tanıyan bir namizəd seçmək istəyən “Yunayted” Kerriklə yanaşı, Solskyaer və Rud van Nistelroyla da danışıqlar aparıb.
Nəticədə Kerrikin namizədliyi yekdilliklə dəstəklənib: idarə heyəti onun liderlik bacarığını, komanda daxilində işləmə təcrübəsini və futbolçular barədə dərin biliyini xüsusi olaraq yüksək qiymətləndirib.
