Xabi Alonso “Real Madrid”dən gözlənilmədən ayrıldıqdan sonra məşqçilik karyerasında növbəti addımı tələsmədən atmağı planlaşdırır. 44 yaşlı mütəxəssis “Santyaqo Bernabeu”da cəmi yeddi ay çalışıb və 34 oyundan sonra postunu itirib. Ona müxtəlif liqalardan, o cümlədən Premyer Liqadan maraq olsa da, Alonso yaxın aylarda işə tələsmək niyyətində deyil.
Bundesliqa zirvəsindən Madrid məyusluğuna
Alonsonun məşqçi kimi reputasiyası 2023/24 mövsümündə Bayer Leverkusenlə Bundesliqanı məğlubiyyətsiz qazanması ilə xeyli yüksəlmişdi. Ardınca o, 236 oyun keçirdiyi Real Madridə qayıtmaq şansını dəyərləndirdi. Lakin Madrid macərası gözlənilən kimi alınmadı: komandadaxili çətinliklər və ulduzlarla (o cümlədən Vinícius Júnior, Jude Bellingham) münasibətlər fonunda yollar ayrıldı.
Premyer Liqa siqnalı
The Times-ın yazdığına görə, sabiq “Liverpool” yarımmüdafiəçisi Premyer Liqaya dönüş variantını açıq saxlayır. Alonso oyunçu karyerasının beş ilini “Enfild”də keçirib, FA Kuboku və Çempionlar Liqası zəfərlərini yaşayıb. Bununla belə, hazırda “Liverpul”un baş məşqçisi Arne Slotla bağlı suallar dolaşsa da, Alonso tələsmir.
Mənbələr bildirir ki, Alonso dincəlmək və iyun ayından etibarən gələn bütün təklifləri sakit şəkildə dəyərləndirmək niyyətindədir. Bu da Premyer Liqaya mümkün dönüşün yaydan sonra gündəmə gələ biləcəyini göstərir.
