Chelsea yanvar transfer pəncərəsində üç yeni futbolçu ilə müqavilə bağlamağa hazırlaşır. Klub bu addımla Yeni il günü baş məşqçi postuna təyin olunan Liam Roseniora güclü dəstək göstərmək niyyətindədir. O, vəzifədə Enzo Marescanı əvəz edib.
The Telegraph nəşrinin məlumatına görə, “mavilər” Roseniora komandanı öz baxışına uyğun qurmaq üçün əlavə resurslar təqdim etmək istəyir. Klubun əsas prioritetlərindən biri mərkəz müdafiə xəttini gücləndirməkdir. Bu mövqe əvvəlki məşqçi dövründə də planlaşdırılsa da, “Çelsi” ötən yay Dean Huijseni transfer etmək uğrunda Real Madridə uduzmuşdu.
Mərkəz müdafiəçisinə ehtiyacın artmasının əsas səbəbləri Levi Colwillin mövsümöncəsi aldığı ciddi zədə və Wesley Fofananın uzun müddətdir davam edən fiziki problemləridir.
Bununla yanaşı, “Çelsi” yay transfer dövrü ərəfəsində yarımmüdafiə və hücum xətti üçün də namizədləri izləyir. Klub sahibləri Todd Boehly və Clearlake Capital qış bazarında uyğun imkan yaranacağı təqdirdə hücum xəttinə də investisiya etməyə hazırdırlar.
“Çelsi”nin diqqət mərkəzində olan oyunçulardan biri də Rennesin yüksək qiymətləndirilən müdafiəçisi Jeremy Jacquetdir. Fabrizio Romano son 24 saat ərzində klublar arasında təmasların olduğunu yazıb.
Lakin Le Parisienn jurnalisti Benjamin Quarez bildirir ki, Renn yanvar ayında Jacqueti satmaq niyyətində deyil. Komanda hazırda Liqa 1-də altıncı yerdədir və baş məşqçi Habib Beyein rəhbərliyi altında Avropa kuboklarına vəsiqə uğrunda mübarizə aparır. Digər mənbələr isə “Çelsi”nin bu ay futbolçu üçün təxminən 50 milyon avro məbləğində təklif verməyə hazır olduğunu iddia edir.
