Mançester Yunayted Ruben Amorimlə yollarını ayırdıqdan sonra yeni daimi baş məşqçi axtarışını davam etdirir və bu prosesdə gözlənilməz bir ad gündəmə gəlib – Carlo Ancelotti. Klub ətrafındakı mənbələr hesab edir ki, hazırda Braziliya milli futbol komandasını çalışdıran təcrübəli mütəxəssis “Qırmızı şeytanlar”a itirilmiş “qalib mədəniyyəti”ni qaytara biləcək ideal fiqurdur.
Ser Aleks Ferqyusonun 2013-cü ildə istefasından sonra “Yunayted” ardıcıl böhranlar yaşayıb. Lui van Qal, Joze Mourinyo və Erik ten Haq dövründə kuboklar qazanılsa da, Premyer Liqa çempionluğu hələ də geri qayıtmayıb. Ötən mövsümün 15-ci pillə ilə başa vurulması və bu mövsüm erkən uğursuzluqlar klub tarixində ən zəif dövrlərdən biri kimi qiymətləndirilir. Amorimin gedişindən sonra komanda müvəqqəti olaraq Michael Carrickin rəhbərliyinə verilib.
Yay üçün əsas təyinat planlaşdıran “Yunayted” Oliver Qlasner, Tomas Tuxel, Qaret Sautqeyt və Luis Enrike kimi adlarla əlaqələndirilsə də, klubun keçmiş məşqçilərindən Rene Meulensteen Ançelottinin ən doğru seçim ola biləcəyini düşünür. Onun fikrincə, Ançelotti yüksək səviyyədə işləməyi, qalib psixologiyasını formalaşdırmağı və müasir futbol idarəçiliyində baş məşqçinin rolunu dəqiq bilən nadir mütəxəssislərdəndir.
Meulensteen vurğulayıb ki, Ançelotti klub strukturu daxilində öz səlahiyyətlərini aydın şəkildə qoruyar və məhz bu məqam Ruben Amorimin “Yunayted”də uğursuzluğunun əsas səbəblərindən biri olub.
